La plievgia dals mais passads han chaschunà ina sminuziun da venditas da glatsch tar ils producents en il chantun. Quai confirma Heike Schulze, ch’è mainafatschenta da Glatsch Balnot SA a Surava. Ella declera ch'els hajan gì paucas venditas da glatsch pervi da l’aura dals davos mais. Plinavant manchian ils giasts en stizuns nua che Glatsch Balnot furnescha ses products. Uschia ha la fatschenta anc pli pauca vendita, dentant era las fatschentas dals revendiders.
lls davos mais èn stads fitg bletschs e fraids. Alura ha la glieud pli pauc gust da mangiar glatsch (...) quai ha sco consequenza che nossa vendita è ida enavos.
Gaudenz Cathomen – da l’interpresa «Glatsch dil bein puril» da Breil –producescha dapi 20 onns glatsch da qualitad da bio cun sia famiglia. Pervi da la trid'aura e las temperaturas bassas han els fin ussa dentant era pli pauca vendita. Quitads ch’el na vegnia betg da vender il glatsch n’haja el tuttina betg. Glatsch è in product che sa lascha bain conservar en la schelentera.
Nus producin sin empustaziun (...). Igl è in zic ina chaussa da rutina – ins sa durant la stagiun ch'i vegn consumà. Da l’autra vart lascha il glatsch era tegnair fitg bun. I n’è betg in problem che nus sesian sin il product.
Igl ha dentant era dà buns mais
La stagiun n’è dentant betg crudada dal tut en l’aua. Sco Sebastian Frey, manader da gruppa en l’ustaria e gelateria Evviva a Cuira declera, han els gia en il mars vendì glatsch. Las temperaturas èn stadas avunda chauds per in glatsch ed il plaschair anticipà han ins sentì. La glieud spetgia sin ils dis cura ch’els possian puspè giudair il glatsch.
Or da l'archiv: