Las turtas da nuschs grischunas cuntegnan fin uss quasi tuttas nuschs da l'exteriur. In pèr purs han vulì midar quai ed han entschet avant plirs onns a plantar nuschers. L'atun 2019 han ils 14 purs, ch'èn organisads en ina associaziun, lura gì lur emprima pli gronda racolta. La finamira è dad - entaifer ils proxims onns - cuntanscher ensemen racoltas da mintg'onn 60 tonnas. L'emprima racolta è cun 3,5 tonnas anc in toc pli pitschna.
Anc custan las nuschs dapli che quellas da l'exteriur
Per la fasa dad uss saja quai dentant gnanc uschè mal. Uschia pon els testar las novas maschinas che smatgan e sorteschan las nuschs. Per l'entira infrastructura ha l'associaziun stuì investir 1,2 milliuns francs. Ella survegn bain sustegn da la Confederaziun, dal chantun e da l'agid da muntogna - tuttina sajan quai blers daners.
Actualmain custan las nuschs anc circa dus fin trais giadas dapli che nuschs da l'exteriur. Per vegnir plaunet en las cifras nairas è quest pretsch uss anc neccessari.
Products regiunals èn dumandads
Ina furnaria ch'è stada fitg intgantada da l'idea da nuschs grischunas - è la furnaria Merz da Cuira. Per ella giajan ingredienzas regiunalas fitg bain ensemen cun la filosofia da la fatschenta, numnadamain da tegnair tut quai ch'è pussaivel en la regiun. Ils custs supplementars ha il client e la clienta da surpigliar – en la furnaria Merz vegn ina turta da nuschs grischuna a custar dus fin quatter francs dapli, che fin uss. La furnaria sco era ils producents da las nuschs èn dentant persvadids, che la clientella è pronta da pajar quel pretsch.
RTR Telesguard 17:40