Cun ina nova purschida vulan la Scol'auta spezialisada dal Grischun sco er il chantun levgiar a fugitivs e fugitivas l’access ad in studi da scola auta. Quai ha communitgà il chantun. Entras ina scolaziun supplementara veglian ins permetter a fugitivs cun sedia en il Grischun e qualificaziuns adequatas l'access ad in studi da bachelor a la FHGR. Uschia pon ils participants e las participantas visitar sper ils curs dal studi er in curs da tudestg academic u in modul da sustegn en matematica. Igl è planisà d'offrir la purschida mintg'onn a 5 fin 10 persunas.
La purschida fa part dal program d’integraziun chantunal. Quai en ils studis da «computional and data science», «information science», «mobile robotics», «photonics», turissem u era sco inschigner da construcziun. Ils emprims sis participants e participantas da la Tirchia ed Ucraina hajan gia cumenzà lur studis quest atun.
Las studentas vegnan preparadas durant dus semesters per il studi da bachelor che suonda pli tard.
Durant quest onn duain las studentas ed ils students era far in praticum. Quel duai avair lieu en in’interpresa grischuna. Ma fin uss n’è quest plan anc betg concret. La FHGR n’ha anc betg chattà per tuts ina plazza da praticum.
Ils scleriments davart ils lieus da praticum èn per il mument anc en lavur. En il decurs da las proximas emnas duess il plan dentant vegnir concretisà.
En in'emprima fasa vegn il nov project da la FHGR finanzià fin l'onn 2027. Quel na vegn betg mo finanzià da la FHGR, mabain er dal maun public e da diversas instituziuns. En l'avegnir duai la purschida daventar in punct fix entaifer il program d'integraziun. Questa finamira na vul betg mo la scol'auta professiunala dal Grischun cuntanscher, mabain er il chantun vesa il project sco mesira necessaria per l'integraziun.
Il project ha la finamira da meglierar la situaziun sin il martgà da lavur so era tar la scolaziun per persunas cun auta qualificaziun, cun ils status da dimora N, F, B u S. Oravant tut dapi l'entschatta da la guerra en l'Ucraina ha la FHGR survegnì dapli dumondas per in studi da persunas fugidas.