Il nov stabiliment per exercizis e scolaziuns dal servetsch da protecziun civila han ins prendì en funcziun il november 2021. Pervi da la pandemia n'è ina inauguraziun uffiziala fin uss betg stada pussaivla. Dapi lura serva el sco lieu da scolaziun per diversas funcziuns da la protecziun civila dal chantun Grischun. Per exempel per ils piuniers, per il sustegn da la direcziun u per il salvament en profunditads. Access al stabiliment han er las organisaziuns partenarias sco l'armada, la Societad svizra per chauns da tschertgas e da salvament, l'Assicuranza d'edifizis, divers corps da polizia, ma er interpresas privatas en il sectur da la protecziun cunter crudadas e firmas sumegliantas.
Il stabiliment cumpiglia ina tur d'exercizi da quatter plauns, gallarias, hallas d'exercizi, in percurs da bastuns, cabinas d'incendi ed ulteriurs posts. La construcziun ha custà bun dus milliuns francs.