Siglir tar il cuntegn

Grischun Protecziun dal sulegl - trais mitos

Cura ch'igl è neblì na dovri nagina crema da sulegl. Sch'ins na vegn betg cotschens, lura n'ha il sulegl era betg fatg donn. U: La vestgadira schurmegia dal sulegl. Tut quai èn tesas davart la protecziun encunter il sulegl. Ma tgeninas én gistas e tgeninas falladas?

Dunna cha stat a sulegl sper la mar.
Legenda: I renda da sa proteger endretg encunter il sulegl. Reuters

Il pli derasà è probabel la tesa, ch'ins na stoppia betg unscher en crema da sulegl cura ch'igl è neblì giuadora. «Igl è uschia ch'ils radis dad UV pon penetrar las neblas. Sulettamain ils radis da la chalur vegnan absorbadas», declera il dermatolog, Reto Schaffner. Oz dettia dentant era cremas dal di che cuntegnian protecziun encunter il sulegl. Uschia sappians er unscher en in tec da lezza per esser schurmegiads.

Negina arsentada = negin donn?

Sch'ins emblida ina giada dad unscher en crema da sulegl e na vegn tuttina betg cotschens. Munta quai lura ch' i haja er dà negins donns? Er quai na constettia betg, uschia Schaffner. Ils radis dad UV sajan tuttina crudads sin la pel.

Il problem è ch'il cancer da la pel alv è la consequenza d'in donn da sulegl cronic, quai vul dir da tut quels radis ch'ins ha «rimnà» durant ils onns

Vestgadira stgira schurmegia

Pon ins dentant er sa schurmegiar dal sulegl cun in T-Shirt? Quai va da principi, sco quai ch'il dermatolog di. Dentant n'è quai betg il cas tar tut il resti. En general vali: Pli stgir ch'il resti è e pli blers radis vegnan filtrads. En sasez sappian ins tener il toc vestgadira encunter il sulegl e guardar atras. «Sch'ins è tschorventands, lura na schurmegia il toc betg dal tut. Sch'ins vesa dentant mo nair, funziuneschi.»

Minisguard: Ord il lexicon per noss pitschens

La stad pon ins giudair dis chauds, dis da bellezza. Bleras persunas giaschan l'entir di en il sulegl per survegnir ina pel bel brina. Dentant, mintgatant cun ina surpraisa la saira. Enstagl da pel brina è la pel tut cotschna. Ina uschenumnada arsa da sulegl. Ma pertge brischa il sulegl insumma nossa pel?