Abitantas ed abitants da l'anteriur abitadi da lavurants Waldhaus a Cuira ston definitivamain bandunar lur chasas. Quai ha decidì l'autoritad da mediaziun per fatgs da locaziun Plessur.
Ils locataris da las chasas dals onns 40 vegnan er obligads da betg inoltrar recurs cunter il project «Baumweissling», scrivan las gasettas da la Somedia. Persuenter dastgian els abitar fin almain ils 31 da fanadur 2021 en las chasas.
Ils abitants eran sa defendids cunter la disfatga dal quartier, perquai ch'i saja sa sviluppà en quel abitadi in spazi biodivers exemplaric. Ed er experts avevan valità il quartier sco degn da vegnir protegì.