Chiara Jacomet e Momo Kawazoe, er enconuschentas sco la band ladunna, èn vegnidas elegidas per represchentar l'ambassada Svizra a Lima. Planisà èn en quest connex quatter concerts en la citad principala da Peru. Nossa redactura Martina Gaudenz ha entupà las duas artistas, venderdi passà, a l'ur da lur concert al festival «fids – Fest in da Steina» a Churwalden ed ha tutgà il puls al duo.
RTR: Co essas vus vegnidas tar questa pussaivladad, da represchentar la Svizra musicalmain ils proxims 10 dis a Peru?
Chiara Jacomet: Jau hai survegnì nunspetgadamain in e-mail cun la dumonda. Oriunda a mai e mes quartet da jazz, là hai dà midadas ed jau n'hai betg pudì far quai uschia. Ma jau vuleva en mintga cas prender quella chaschun. Jau hai lura ditg che jau sun era part d'in duo, sche quai fiss era in'opziun. Ed jau hai era tramess ad els nossa musica. Ed els han lura immediat ditg, gea quai è super, ladunna dastga vegnir. Ma pertge ch'els èn vegnids exact sin nus, u l'entschatta sin mai – nagina idea! Jau crai entras il rumantsch. Nus stuain alura dumandar cura che nus essan a Lima co ch'els èn vegnids sin nus.
Vus dastgais dar concerts en num da l'ambassada svizra. Tge munta quai per vus?
Momo Kawazoe: Insaco èsi ina curiusa responsabladad da represchentar la Svizra. Schebain, uschiglio n'ans vendain nus betg sur la naziunalitad. Ma tuttina è quai insaco ina part da la Svizra che nus purtain lura insanua. E per nus èsi era in'onur.
Chiara Jacomet: Absolutamain, dastgar ir forsa sco l'emprima band rumantscha, da dunnas era, internaziunal e lura gist sin in auter continent è bain ina gronda, gronda onur e fa enorm plaschair.
Lima, la chapitala dal Peru, nua che bunamain 10 milliuns persunas vivan ha in zic autras dimensiuns che quai che nus avain qua en Svizra. Tge fa quai cun vus?
Chiara Jacomet: Jau crai che jau n'hai gnanc anc realisà propi tge che spetga nus. Era sche essan gia stadas en grondas citads sco New York ch'han gea er autras dimensiuns. Jau hai mirveglias tge che spetga nus en l'America dal Sid. Jau crai, jau vegn lura a sentir quai cura nus essan lura là.
Momo Kawazoe: Jau crai che gist cura ch'igl è uschè grond na pon ins gnanc cumparegliar quai. Jau pens adina puspè vi da Peru, ma i na fa nagut a mai. Perquai ch'ins cumenza da nulla, ins n'enconuscha nagin là. Igl èn simplamain novas schanzas che spetgan. E nus faschain simplamain co che nus faschain adina. Forsa essans schon in zic gnervusas, perquai ch'igl è simplamain in nov mund. E l'America dal Sid è en sasez insatge dal tuttafatg nov per nus duas.
Ussa anc ina dumonda organisatorica. Co transportais vus insumma voss instruments a Lima, cunzunt la battaria?
Momo Kawazoe: Nus prendain cun nus chaussas pitschnas, las pli impurtantas e sensiblas. Tut l'auter vegn mess a disposiziun là. Nus stuain lura simplamain vegnir a frida cun quai che vegn ad esser là. I na vegn forsa betg ad esser exact quai che nus avain uschiglio cun nus.
Chiara Jacomet: Gea, ma igl è bain stà ina enorma lavur organisatorica.
Vus, ladunna, spetgan quatter concerts a Lima. Datti schon in highlight e pertge?
Chiara Jacomet: Gea, jau crai, propi pudair dir lura tge ch'è stà il highlight, pudain nus pir cura che nus avain sunà. Ma jau crai che nus omaduas ans legrain uss fitg sin il concert en il club «Cocodrilo Verde». Nus sunain numnadamain quatter concerts. L'emprim concert vegn ad esser mesemna ils 13-08-2025 per scolaras e scolars secundars en la scola svizra da Pestalozzi. Lura la gievgia sunain nus en l'ambassada svizra ed il venderdi datti lura propi in concert uffizial la saira a las 20:00 en il «Cocodrilo Verde». Lura avain nus dus dis pausa e glindesdi sunain nus anc en il «Gran Teatro Nacional».
Essas er in zic gnervusas?
Momo Kawazoe: Definitiv!
Chiara Jacomet: Gea, l’ambassada Svizra ha ina festa cun blera glieud da la politica e nus essan vegnidas supplitgadas d'interpretar il psalm svizzer. Las davosas emnas avain fatg in’atgna versiun à la ladunna dal psalm. E «the pressure is on» (en rumantsch: il squitsch è grond).