Ils pumpiers grischuns èn pli e pli savens en acziun. L'onn passà – passa 1'600 giadas, sco l'Assicuranza d'edifizis dal Grischun scriva. Aifer ils 5 onns passads è il dumber dals engaschis dals pumpiers creschì per passa 40%. Ina raschun per quest augment sajan detecturs d'incendi. Tals apparats èn installads per avertir automaticamain d'incendis, per exempel en bajetgs gronds. Ils pumpiers vegnan alarmads, ma savens na brischa quai la finala tuttina betg, i sa tracta d'in fauss alarm.
Pertutgads da fauss alarms sajan cunzunt ils pumpiers da citads e da regiuns turisticas. Mintgatant brischia però propi, di l'inspectur chantunal da pumpiers Conradin Caduff.
Nus prendain mintga cas serius. Sch'i dat pliras giadas en il medem lieu in alarm da sbagl, lura prendan ins quai main serius, tge ch'è natural. Tuttina pudessi esser insatge. Quai è il privel da fauss alarms chaschunads entras malprecauziun.
Ils pumpiers èn il davos onn era sa gidads tar accidents sin via e tar eveniments d'aura u natira. En tut èn els stads 25'000 uras en acziun.
Investiziuns per cumbatter incendis da guaud
L'Assicuranza d'edifizis investescha ensemen cun l'Uffizi chantunal per guaud e privels da natira e las vischnancas en il cumbat encunter incendis da guaud. En intginas vischnancas datti batschigls fixs per aua da stizzar – che helicopters pon nizzegiar. Savens saja il diever d'in helicopter essenzial per evitar ch'in fieu sa derasia, scriva l'assicuranza.
Plinavant hajan ins modernisà ils posts da cumbat d'incendis da guaud cun novas pumpas e tut ils pumpiers duain survegnir nov equipament per cumbatter fieus da guaud. Era saja vegnì investì en la scolaziun da cader da pumpiers e da lavurants da guaud, per garantir ina buna collavuraziun, di Conradin Caduff.
Or da l'archiv
Era a l'eroport hai pumpiers, ed era quels ston adina puspè exercitar il cas urgent
