La punt da Son Gliezi è in project cun ina lunga istorgia. Gia l'entschatta dals onns 1970 han ins elavurà in project «Hochbrücke Plessur» per colliar la via che maina da Cuira vers Lai cun la via d'Arosa. Quest project n'è però mai propi vegnì enconuschent. L'ultim project per la punt era vegnì annullà il 2008 sin basa d'ina sentenzia dal Tribunal federal.
Project d'exposiziun la fin da l'onn
Tar la preschentaziun dal project il 2021 ha il cusseglier guvernativ responsabel Mario Cavigelli ditg envers RTR ch'ins possia far quint che la punt possia vegnir construida en tschintg fin set onns – sche tut giaja bain.
-
Bild 1 von 4. Ina visualisaziun da la punt, co ella vesess ora en la cuntrada. Bildquelle: Conzett Bronzini partenaris SA.
-
Bild 2 von 4. Cun la punt da Son Gliezi duai la citad veglia da cuira vegnir distgargiada dal traffic. Bildquelle: Chantun Grischun.
-
Bild 3 von 4. Il plan per la punt. Bildquelle: Conzett Bronzini partenaris SA.
-
Bild 4 von 4. La punt da surengiu. Bildquelle: Conzett Bronzini partenaris SA.
Actualmain elavura l'Uffizi da construcziun bassa il project d'exposiziun, per tudestg «Auflageprojekt». Quel duai tenor l'inschignier chantunal Reto Knuchel esser sin maisa la fin da l'onn. Prognostitgar, cura ch'ins possia cumenzar cun las lavurs da construcziun, na possi el betg.
Tar projects gronds possia adina puspè dar craps da stgarpitsch, declera l'inschignier chantunal. In da quels sajan par exempel protestas tar il project d'exposiziun, quellas possian ins trair enavant fin avant il Tribunal federal. En il chantun sajan plirs projects gronds en discussiun.
L'incumbensa «Michael»
L'incumbensa dal cusseglier grond Maurizio Michael da la PLD – ch'è vegnida surdada a la regenza l'avust 2024 – pudess er avair in'influenza sin il project da la Punt Son Gliezi. Dentant er sin auters projects gronds da construcziun da vias en il chantun. Quella pretenda da far pussaivel en l'avegnir che dus u plirs projects chantunals gronds pudessan vegnir realisads il medem mument.
En la strategia actuala dal chantun na saja quai betg pussaivel, declera l'inschignier chantunal Reto Knuchel. Il chantun realisescha be in project grond suenter l'auter – quai saja surtut er ina dumonda da finanziaziun. Cun l'incumbensa Michael pudess quai sa midar en il rom dal proxim program per construcziun da vias chantunal per ils onns 2029 fin 2032.