Francisca Obrecht vesa ina schanza
Francisca Obrecht e ses um possedan dapi il 2006 il bain da vin Obrecht a Jenins e Malans. Sin bun set hectaras produceschan els vin biologic. Era sche l'uniun purila di duas giadas Na a las iniziativas agraras ed era l'uniun dals viticulturs è encunter – Francisca Obrecht è per las duas iniziativas.
Gist l'iniziativa per aua da baiver netta pudess tenor Francisca Obrecht purtar meds finanzials supplementars per perscrutar e sviluppar alternativas en la producziun senza pesticids sintetics. Era sin lur manaschi stuess ins desister dad ina u l'autra metoda da protecziun per la cultivaziun. La viticultura chapescha perquai la tema dals purs da las midadas che spetgan tar in Gea a las iniziativas. Tuttina è ella da l'opiniun, ch'i saja uras da far quest pass.
I drova curascha da far quest pass – ma ì renda da far el.
Tema ch'ils pretschs dals products ed entras quai il turissem da cumpra creschian, n'ha Francisca Obrecht dentant betg. E che blers purs e puras midassan lura sin products da bio e ch'els sezs avessan uschia dapli concurrenza, na saja per ella betg in privel mabain ina schanza.
Tenor Ursin Gustin han ils purs gia fatg bler
Ursin Gustin è vicepresident da l'Uniun dals purs giuvens svizzers e sez pur da bio. Sin ses bain puril en la Val Schons ha el circa 30 vatgas da latg. Era sch'el producescha latg biologic e n'è perquai betg avisà sin pesticids, è el cunter las duas iniziativas agraras.
Las duas iniziativas agraras giajan en la dretga direcziun, ma ellas sajan memia extremas, di Ursin Gustin. Ils purs hajan ils davos onns gia fatg bler per ina producziun pli ecologica e biologica. Quai vesian ins tenor el, sch'ins guardia sin il svilup dals davos 20 onns.
Sco pur giuven saja el ina part da la generaziun che fiss il pli pertutgada da las consequenzas da las duas iniziativas. Dal scumond da pesticids na fiss Ursin Gustin betg uschè pertutgà. Ma cun in Gea a l'iniziativa per aua da baiver netta, na dastgass el betg pli cumprar vitiers pavel per sias vatgas.
A tscherts purs vegn mussà il det, sch'els van a squittar pesticids. Nagin pur fa quai gugent, quai custa gea era als purs. Ils blers dattan fadia e fan be quai, ch'i fa propi da basegn.
Cunzunt la tema, ch'il turissem da cumpra pudess s'augmentar, è gronda tar il pur giuven da la Val Schons. Tenor el stuessan ils consuments l'emprim esser pronts da cumprar tut be products biologics.
Pur da bio da Malans è cunter l'inizitiva
Ueli Liesch da Malans demonstrescha sia maschina cun sprizzar aua. Il pur da vin producescha dapi curt a moda biologica. Er el dovra pestizids – dentant nagins sintetics sco tgi fiss lubì a moda convenziunala. Tuttina è il pur da bio encunter l’iniziativa.
