Siglir tar il cuntegn

Header

cuntegn

Purtret Catrina Bonorand – La pli rumantscha da Trin

Sch’i va per linguas, lura traglischan ils egls da Catrina Bonorand. La dunna oriunda da la Belgia è gia dapi passa 50 onns en Svizra. Ella era arrivada en il Grischun sco Au-Pair.

Naschida e creschida si è Catrina Bonorand-Heyerick a Gent en la Belgia. Previs fissi stà, da forsa ina giada studegiar sin il gimnasi. Ma questa via n’aveva betg plaschì ad ella. Uschia aveva Catrina pachetà cun 19 onns la valisch ed è ida sco Au-Pair sin in bain puril a La Punt Chamues-ch. Là steva ella tar ina famiglia cun quatter figls – e tuts discurrivan rumantsch, be Catrina betg.

video
Catrina Bonorand discurra currentamain puter e rumantsch da Trin
Or da Telesguard dals 21.12.2021.
laschar ir. Durada: 3 minutas 27 Secundas.

Da temps nua ch’ins pudeva anc fimar

Da quest temp eri anc usità da magari fimar, ed uschia schevan ils giuvens a Catrina da dar ad els il tschendrer. Insatge ch’ella na fascheva insumma betg gugent. Quai era motiv avunda per emprender tant pli svelt il rumantsch. Pertge uschia ha ella pudì respunder e dar cunter al giavisch dal tschendrer: «Prenda toch tez!». Aifer in’emna pudeva ella gia communitgar las chaussas essenzialas.

Pli tard ha Catrina lura emprendì d’enconuscher ses um Edi, ch'era oriund da Trin. Lez aveva parents en l’Engiadina ed era il padrin da la figliola da Catrina, uschia che sias visitas en l’Engiadina eran stedias. Uschia ha Catrina emprendì d'enconuscher ses um futur. In per onns pli tard èn els sa chasads a Trin ed han fundà ina famiglia.

Grazia ad uniuns è Catrina s'integrada svelt

A Trin è Catrina lura ida en bleras uniuns, uschia p. ex. en l’uniun da dunnas, il chor, la Cuminonza Romontscha da Trin ed è era stada plirs onns calustra. Grazia a questas interacziuns ha ella emprendì d’enconuscher svelt l’entir vitg ed era il rumantsch da Trin, ch’è ozendi la lingua da sia famiglia.

Discurrer discurra ella perfetg rumantsch da Trin, scriver scriva ella Sursilvan – e sch'ella è in temp pli lung en l'Engiadina, vegn perfin nanavant in zichel Puter da ses emprim contact rumantsch. Ella scriva er poesias per rumantsch. Il pli gugent davart utschels e la natira.

La veta

Avrir la box Serrar la box

Ei catscha in niev gi, utschals pon cantar
Jeu audel lur sempel e legher schular
Lur cont mei legrescha, levgescha trasor
Ei catscha in niev gi, selegra miu cor!

Ei suondan las stentas, luvrar e barhar
Mo er' cuntentientscha, saltar e cantar
La veta sevolva, semida trasor
Ei drova capientscha, uss spetga miu cor!

Ei tucca la sera, il gi ei vargaus
La notg ei vegnida e porta ruaus
Cordolis sbliheschan, svaneschan traso
Ei tucca la sera, secalma miu cor!

› poesia da Catrina Bonorand-Heyerick

RTR Telesguard 17:40

Artitgels legids il pli savens