Puschlav - L’istorgia dal tubac en il Puschlav duai betg ir en emblidanza

Betg mo sin las inslas en la Caribica vegn producì ed elavurà tubac. Fin curt avant ils onns 2000 èn er vegnidas elavuradas plantas da tubac a Brusio. La famiglia Misani produciva en ina fabrica il tubac per pipas ed auters products.

L'istorgia dal tubac a Brusio

Cumenzà ha l’istorgia cun las emprimas plantas da tubac ch'èn vegnidas cultivadas a Brusio, dals onns enturn 1840, uschia Pietro Misani, producent da vin e cuniniziant dal «Museo del Tabacco». Ils purs eran en tschertga d’ina nova funtauna d’entradas. La feglia da tubac, che derivava dals champs da tubac en la part sut da Brusio, era enconuschenta per sia fermezza e ses ferm aroma. Dad elavurar quest tubac en las fabricas en il Puschlav n'era betg pussaivel, precis pervi da la fermezza dal product. Uschia che las fabricas han stuì importar tubac pli adattà. La feglia dentant, è vegnida transportada ed elavurada a Brisago en il chantun Tessin, declera Pietro Misani.

La fabrica da tubac en stadi original

Dals onns 1860 è alura vegnida fabritgada la chasa per la producziun da tubac. En il plan terren da la fabrica era la pitschna producziun, cun trais maschinas per tostar, tagliar e producir ils products da martganzia. Cigarettas na vegnivan betg producidas pervi che quai na rendeva betg. Cigaras èn però vegnidas producidas en in volumen plitost pitschen. Il product principal era il tubac per la pipa.

Preservar ils indrizs per la memoria    

Sin il segund plaun da la chasa da pli baud era in biro ed il local da vendita. Il terz plaun sut il tetg vegniva duvrà sco local per sientar feglia da tubac. Tut la producziun era pia sut in tetg.

Uss vegn la chasa renovada cun la finamira dad avrir in museum per l’istorgia dal tubac en la Val Puschlav. Cun documentar l’istorgia vul la societad «Museo del Tabacco» preservar l’istorgia da questa planta a Brusio ed en il chantun Grischun.

Impressiuns dal museum