Siglir tar il cuntegn

Header

cuntegn

Quant avert per queers è il GR «Jau hai gì ina bella giuventetgna – ma ella n'era betg queera!»

Durant ina saira en la biblioteca da la citad da Cuira è vegnì discussiunà quant avert ch’il Grischun è per persunas queeras e tge purschidas che la community giavischass.

Tar ina chaussa eran tut las participantas e participants da la medema opiniun: Il Grischun n’è betg fitg avert per persunas queeras. Malgrà ch’i saja en la citad da Cuira in zichel meglier ch’en las valladas survegn il Grischun da la communitad mesemna saira be la nota trais – e quai sin ina scala 1 - 10.

La nota 10 poi pir dar sche jau poss chaminar tras ils vitgs u ir en sortida e trair en quai ch'jau less, senza avair il sentiment da vegnir discriminà, exclus u survegnir il sentiment ch'jau sun fauss uschia sco ch'jau sun.
Autur: Nic Senften suprastanza Khur Pride
audio
Quant avert per queers è il Grischun?
ord Actualitad dals 02.12.2022. Maletg: RTR
laschar ir. Durada: 3 minutas 54 Secundas.

Paucas purschidas, visibilitad ed acceptanza

Malgrà la «Khur Pride» ch’era il zercladur passà u l’organisaziun sco il «sozialwerk.LGBTQ+» ch’organisescha differentas occurrenzas en la regiun da Cuira e Val dal Rain na tanschia quai betg, di tranter auter Silvia Hofmann, deputada dal Cussegl grond ed experta per l’egualitad.

Quai vesan er las giuvnas persunas queeras dal chantun Grischun uschia: Ellas ed els giavischassan dapli purschidas da s’entupar e sa barattar en l’entir chantun e betg be a Cuira. Vinavant giavischassan bleras e blers er in lieu da sortida per ellas ed els.

In club ch’è in safe space per persunas queeras. Jau chapesch sch’insatgi va insanua auter en sortida perquai ch’ella u el na sa senta betg bain qua ed ha tema da tups spruhs.
Autur: Andri 18 onns, da Cuira
audio
Giavischs dals giuvens queers en il Grischun
ord Actualitad dals 02.12.2022. Maletg: RTR
laschar ir. Durada: 3 minutas 35 Secundas.

Mintgina e mintgin po gidar

Mintgina e mintgin possia schon oz far chaussas per laschar sentir persunas queeras dapli accetpanza en nossa societad, din Nic Senften e Silvia Hofmann. Saja quai cun s’infurmar, vesair mintga persuna sco carstgaun e tractar ellas ed els cun respect, esser tolerant ed avert envers persunas queeras ed acceptar ellas.

RTR actualitad 06:00

Artitgels legids il pli savens

Scrollar a sanestra Scrollar a dretga