Siglir tar il cuntegn

Header

audio
Per tadlar
Or da Actualitad dals 16.03.2023. Maletg: RTR
laschar ir. Durada: 2 minutas 44 Secundas.
cuntegn

Quint annual 2022 Cuira ha fatg in gudogn da 16,9 milliuns francs

La citad da Cuira ha il 2022 fatg in gudogn da 16,9 milliuns francs. Quai èn 15,7 milliuns dapli che budgetà. Motiv per il surpli en tant expensas pli bassas, sco er entradas pli autas.

En tut ha la citad dà or 262,3 milliuns francs – budgetà fissan stads 271 milliuns francs. In dals motiv sper la differenza èn ils custs da gestiun. Quels eran in bun toc pli bass che previs. Plinavant budgeteschia Cuira adina pli aut che atgnamain necessari. Uschia vulan ins evitar ch'ins surpassa il budget. En quel cas stuess la citad dumandar il parlament per in budget extraordinari.

Las entradas eran cun 279,1 milliuns francs var 6 milliuns francs pli aut che previs. Ins haja incassà l'onn 2022 dapli taglia – tant da persunas natiralas, sco er per exempel ord taglia da fund.

Pli paucas investiziuns che budgetà

Cun 42,6 milliuns francs ha la citad da Cuira investì radund 25 milliuns – var in terz – pli pauc che planisà. Motiv per quai sajan retards tar investiziuns grondas, sco per exempel tar la scola Fortuna, tar il nov archiv da la citad u las scolas da Haldenstein e Maladers.

Il chapital da la citad è s'augmentà dapi il 2015 per 167 milliuns francs, sin uss 658 milliuns. La situaziun finanziala da la citad saja buna, uschia ch'ins possia far las investiziuns tenor la planisaziun da plirs onns.

RTR novitads 11:00

Artitgels legids il pli savens