Sco gia ils davos onns ha il chantun er per l'onn passà nudà in gudogn, malgrà ch'el aveva quintà en il preventiv cun in minus. Concret munta quai, ch'il chantun ha fatg in gudogn operativ da 120,5 milliuns francs, budgetà aveva el in deficit da 10,4 milliuns francs. Quai malgrà ch'i n'ha dà nagins daners da la Banca Naziunala Svizra, l'onn 2022 aveva il chantun anc survegnì 92,4 milliuns francs.
Jau crai che nus dastgian esser cuntents.
Per quest resultat positiv datti tenor il chantun differentas raschuns, per ina è vegnì da or pli pauc che budgetà; per exempel tar ils custs da persunal, là ha il chantun dà or 427 milliuns francs, quai èn 19 milliuns pli pauc che quintà. Tut en tut ha el dà or 182 milliuns francs pli pauc che budgetà. La pli gronda cumpart ha el spargnà tar las contribuziuns a la communitad ed a terzs cun 61 milliuns francs pli pauc che budgetà.
Da l'autra vart hai dà dapli entradas che spetgà, per exempel tar las entradas da taglia; là aveva il chantun quintà cun 880 milliuns francs entradas, effectiv èn vegnids en 940 milliuns francs. Las entradas da taglia èn creschidas da persunas natiralas per 5% e da persunas giuridicas per 4% cumpareglià cun il 2022.
Vista en il futur
Per l'onn 2024 saja bain er da quintar cun in resultat positiv, dentant cleramain sut il nivel dals davos onns. I vegnia a dar pli paucas entradas, sco per exempel pli paucs daners or da la gulivaziun da resursas da la Confederaziun u er en connex cun l'indemnisaziun per la renunzia al return dals implants (Heimfallverzichtsentschädigung). Per ils onns 2025 fin 2028 èsi lura da quintar cun deficits che creschan fermamain. Cunzunt investiziuns en il sectur da construcziun creschan andetg il 2025 per 45 milliuns.
Er sch'ils custs creschan en l'avegnir vesi grazia al chapital agen ora bain.
Er ch'il pe da taglia è vegnì sbassà per persunas natiralas per 5% saja lura da sentir en ils proxims onns. Ed er sch'i dat daners da la Banca naziunala Svizra saja fitg intschert ils proxims onns. Perquai duai vegnir nizzegià chapital agen davent dal 2025 per minimar quests custs supplementars. Las premissas sajan bunas per dumagnar las sfidas finanzialas che spetgan.