L'october da quest onn ha il chantun Grischun dumbrà 2'027 persunas dischoccupadas. Quai correspunda ad ina quota da dischoccupaziun dad 1,8%. Quai è in cler augment cumpareglià cun il mais avant. Il settember aveva il chantun registrà 1'476 persunas dischoccupadas, quai che correspunda ad ina quota da dischoccupaziun da 1,3%. Sco il chantun scriva, ha l'augment da l'october raschuns stagiunalas, ch'èn da contribuir a la fin da la stagiun da stad ed atun en il sectur da turissem.
Ultra da quai èn vegnids registrads 1'194 persunas betg dischoccupadas che tschertgan lavur. Latiers tutgan persunas che fan part da programs da furmaziun ed occupaziun u han in gudogn intermediar. En tut ha il chantun Grischun uschia nudà l'october 3'221 persunas che tschertgan lavur.
Quota da dischoccupaziun en Svizra tar 3,2%
Guardà sur l'entira Svizra è il dumber da dischoccupads creschì be minimal. Il settember aveva l'entir pajais anc dumbrà 148'560 persunas dischoccupadas, l'october eran quai 149'118. La quota da dischoccupaziun per la Svizra munta uschia a 3,2%. Il dumber da persunas betg dischoccupadas che tschertgan lavur munta per l'entir pajais a 92'342 persunas. En tut hai uschia dà l'october 241'460 persunas che tschertgan lavur.
Lavur curta en Grischun
Il mais d'october han 418 manaschis grischuns survegnì indemnisaziuns per lavur curta. Cumpareglià cun il mais avant cun 707 manaschis, è quest dumber sa sbassà. Cunquai che las interpresas han però trais mais temp per annunziar lavur curta, n'èn quellas cifras betg definitivas ed i n'è uschia betg pussaivel da gia prender conclusiuns.
