Creatiras u in crap, ina planta u in object, mintga materia ha ina radiaziun individuala. Questa radiaziun po sentir mintgin e mintgina da nus ed il medem mument po mintgin er influenzar la radiaziun. Cun agid d'in pendel u ina pertga po vegnir visualisada l'energia. David Baselgia, il president da l'Uniun grischuna da radiestesia di en quest connex: «Mintgin da nus sa pendular». El di dentant er ch'i dovra la dretga dumonda e surtut da sa laschar sin l'agen sentiment e betg laschar cumandar la testa. Cun magia u hocuspocus n'haja la radiestesia da far nagut. I saja ina savida veglia ch'ins haja emblidà cun ils onns.
Co funcziuna radiestesia?
Avrir la boxSerrar la box
Radiestesia declera la sensibilitad sin irradiaziun. Igl è ina sensibladad speziala ed in dun da persunas cun percepziun fitg fina sin radiaziuns e vibraziuns. Da princip po mintgina e mintgin retschaiver quests signals. Ils radiestesists examineschan dentant quests signals cun pendels ed auters utensils.
La radiestesia fisicala perscrutescha objects materials sco minerals, metals, plantas u corps. Ella parta dal fatg che vibraziuns da tut ils objects fisics èn la basa e che questas vibraziuns sa laschan manipular.
La fermezza da questas energias vegn mesirada en la unitad da mesira da bovis. La unitad da bovis n’è dentant betg ina unitad fisicala mabain ina unitad ch’è intuitiva è dependenta da la persuna cun la batgetta magica.
Grond interess
Legenda:
Grond interess a l'excursiun da l'uniun da radiestesia.
RTR
L'interess per l'uniun e la lavur saja ils davos onns creschì. Cun excursiuns en la natira e cun scolaziuns da basa emprova l'uniun da dar enavant la savida per il bun da carstgauns ed animals. Insatge saja dentant er segir, raquinta il president: «Finì d'emprender n'han ins mai».
