Radio Grischa ha decidì d'integrar musica generada d'intelligenza artifiziala (IA) en ses program da notg, quai cunzunt per spargnar custs. Uschè bler na midia dentant betg, uschia Silvio Lebrument, il president dal cussegl administrativ da la Somedia. Gia uss hajan els in program da notg cun musica nua ch'els na stoppian betg pajar taxas a la Suisa, la societad svizra per ils dretgs d'autur. Questa nova metoda cun agid d'IA permetta dentant da producir musica pli simpel e pli spert, quai che resulta en respargns, con auts che quels èn na pudeva Silvio Lebrument anc betg dir.
Malgrà l'integraziun da musica d'IA durant la notg, restia Radio Grischa engaschà per la promoziun da musicists locals durant il di, uschia Silvio Lebrument vinavant. Ad els saja vinavant impurtant da dar ina plattafurma a musicistas e musicists svizzers e grischuns.
Ina discussiun globala
Entant che Radio Grischa ha fatg il pass vers musica d'IA, è quella tar Radio RTR nagin tema, uschia Flavio Tuor, il responsabel da musica tar RTR. Sin undas rumantschas datti durant la notg vinavant musica exclusivamain grischuna. El exprima entant ses quitads davart la musica creada d'AI, argumentond che questa na po betg crear insatge da cumplettamain nov, mabain sa basa sin musica existenta.
Questa discussiun davart l'utilisaziun da l'intelligenza artifiziala en il sectur da musica è in tema global che pretendia decisiuns legalas e politicas a lunga vista per proteger ils dretgs dals artists e per segirar la diversitad musicala – da quest avis èn tant Flavio Tuor sco era Silvio Lebrument.
