Las dispitas cuntinueschan. Suenter che l'institut per la proprietad intellectuala ha stizzà la marca «Radio Grischa» or dal register da las marcas protegidas, vulan Roger Schawinski e Stefan Bühler occupar ella. E quai fani cun in radio online. Il radio è gia online cun il num «Radio Grischa – Stream». Per gronda part vegn emess musica e tranteren datti singuls blocs discursivs. Quai per far attent, tge ch'ins dastga spetgar en il futur, ha Roger Schawinski declerà envers RTR.
La finamira è da mussar preschientscha e da sa preparar sin il temp, cura che nus pudain far radio 'endretg'.
Per metter a lieu: In radio online po lantschar, tgi che vul. I na drova er nagina concessiun da far quest pass. La Somedia che emetta er in radio cun il num «Radio Grischa» na vul betg anc laschar guardar en las cartas. Sin dumonda dad RTR ha ditg il mainagestiun da la partiziun medias tar Somedia Silvio Lebrument ch'ins vegnia ed evaluar la situaziun pli exact e suenter decider, tge mesiras instradar.
En questa procedura hai gia dà tantas midadas, stortas e surpraisas. Igl è ina istorgia senza fin e donn ch'ins na possia betg impunder l'energia per insatge auter.
Dapi il december 2024 emetta l'anteriur «Radio Südostschweiz» ord la chasa Somedia puspè sut il num «Radio Grischa». Quai schegea che Roger Schawinski e Stefan Bühler avevan annunzià da vulair emetter lur radio cun il num da project «Radio Alpin» danov sut il num «Radio Grischa».
«Radio Grischa» cun program da test online
Entant han Roger Schawinski e Stefan Bühler drizzà en in stream cun musica online cun la marca «Radio Grischa» sco program da test. Actualmain pon ins tadlar musica en il stream - la finamira principala saja però dad era porscher cuntegns schurnalistics. La dispita per la concessiun na saja anc betg concludida, scrivan ils responsabels online.
Vi e nà gia tar la concessiun
Gia tar la concessiun avevi dà proceduras lungas e lunghissimas. L'emprim aveva l'Uffizi federal da communicaziun (BAKOM) dà la concessiun al duo Schawinski e Bühler per lur project, uschia che las contribuziuns da sustegn fissan era idas ad els.
La Somedia ha silsuenter fatg recurs – ed il schaner passà ha il Tribunal administrativ federal retratg la concessiun al project da Schawinski e Bühler, uschia che la concessiun va puspè enavos tar la Somedia. Però n'avevan Bühler e Schawinski betg acceptà la decisiun.