La radunanza communala da Churwalden ha approvà ina revisiun totala da la lescha da turissem. Tranter auter po da nov vegnir incassada la taxa da giasts sco taxa pauschala.
Plinavant conceda la radunanza communala ina contribuziun communala da maximalmain 246'000 francs als organisaturs dal campiunadi mundial da biatlon 2025 a Lai. Ultra da quai ha la radunanza communala approvà il preventiv 2024. Quel quinta cun in surpli d'entradas da passa 112'000 francs. Quai tar entradas ed expensas da radund 15,7 milliuns francs. Il pe da taglia resta tar 90% da la taglia chantunala simpla.