La suprastanza da la Selva (Associaziun dals proprietaris da guaud dal Grischun) cun ses president Leo Thomann è stada magari surpraisa cura ch'ina gruppaziun, surtut da selviculturs, ha purtà Daniel Bürgi sco candidat selvadi. Quai per il post da Gian Cla Feuerstein da S-chanf ch'ha stuì chalar pervia da la limitaziun d'uffizi. Daniel Bürgi è president communal da Flerden e dapi blers onns selvicultur da revier da la Mantogna. Tenor el e la gruppa ch'ha proponì el, sesan en la suprastanza da la Selva memia blers cun memia blers interess, surtut era chatschaders e blers portian pliras chapitschas. El veglia surtut sa stentar per ils interess dals possessurs dal guaud ch'appartegn per la gronda part a las vischnancas. Il pli grond quità da lezs è tenor il nov elegì Bürgi, da regiuvinar ils guauds.
Engiadina betg pli en suprastanza
Cunquai che Victor Peer, il capo communal da Valsot che la suprastanza aveva proponì sco nov en il gremi, ha fatg be 91 vuschs e Bürgi 125, n'èn l'Engiadina ed insumma l'entir Grischun dal sid, betg pli represchentads en la suprastanza da la Selva. Quai almain per ils proxims trais onns. Lura èn puspè elecziuns e plirs ston chalar pervia da la limita dal temp d'uffizi, era il president Leo Thomann.
