Sch'ins va p. ex. a Laax, Claustra u San Murezzan en vacanzas pon ins far diever d'applicaziuns digitalas per s'orientar, chattar occurrenzas u duvrar las pendicularas. Las interpresas che stattan actualmain davos las applicaziuns da las grondas destinaziuns grischunas, sviluppeschan uss cun radund in milliun francs ina purschida da basa per tals products che tut las destinaziuns turisticas dal Grischun pon duvrar. En tut è il project budgetà cun 3,23 milliuns francs. Quai scriva la Regenza grischuna en ina communicaziun.
Colliar giasts, pendicularas e fatschentas digitalmain
Cun il project duai vegnir mess la basa per in sistem e «mund» digital en il turissem grischun. En in tal duain giasts, pendicularas ed auters purschiders sco per exempel hotels pudair communitgar e s'infurmar. Tenor la regenza manca actualmain la dretga schelta da tools per crear aventuras digitalas. Sur tut ora giaja per pudair porscher en l'avengir ils dretgs products, il dretg mument als dretgs giasts. Quai duai far pli attractiv il Grischun per far vacanzas.
La lescha chantunala pleda en tut 40 milliuns francs per promover projects da digitalisaziun en il Grischun. Mo paucs dals daners èn fin uss currids en projects. Per exempel ha la regenza dà 105'000 francs per sustegnair il svilup d'ina applicaziun per il campiunadi mundial da cursas d'orientaziun a Laax il 2023.