Las cundiziuns en las muntognas sur il cunfin dal guaud n'èn betg adina uschè simplas. Lungs envierns, curtas stads ed adina puspè midadas da l'aura. E tuttina - en las regiuns alpinas dal Grischun vivan millis da spezias. Da preschentar quellas a la publicitad è la finamira da l'exposiziun speziala dal Museum da la natira dal Grischun.
S'adattar per viver en las muntognas
L'exposiziun porta il num «rampignaders e dormulents». Animals en la muntogna ston s'adattar a lur cundiziuns da viver. In «rampignader» è il sfendacrap cun feglia opposta. El crescha sin 4500 meters sur mar e vertescha temperaturas da fin-40 grads. La «dormulenta» la pli enconuschenta è la muntanella. Ella dorma durant l'entir enviern en sia tauna sut terra.
Excursiun tras las muntognas
L'exposiziun maina da 1800 meters sin 3000 meters sur mar tras quatter secturs. Mintga sectur simbolisescha ina autezza sur mar. I vegn preschentà passa 30 plantas ed animals da las alps grischunas – quai cun preparats, fotografias, models, tuns, odurs e filmins. L'exposiziun è in'atgna producziun dal museum da la natira Grischun e duai er vegnir exponida en auters museums.
L'exposiziun cuzzà dals 17 d'avrigl 2019 fin ils 19 da schaner 2020.
RR actualitad 17:00