Sonda saira ha ina bova sutterrà parzialmain ina chasa a Maladers. Persunas na sajan betg vegnidas blessadas. Quai ha communitgà la Polizia da la citad da Cuira. Ella saja vegnida infurmada ier saira curt suenter las 21:30 davart l'incident. Ils pumpiers hajan stuì salvar dus abitants ord la chasa. Quels possian puspè turnar a chasa, uschespert che las lavurs da rumida sajan terminadas. Quai ha ditg in pledader da la Polizia da la citad da Cuira sin dumonda da l’agentura da novitads Keystone-SDA. I na dettia nagin privel per in’ulteriura bova.
La bova haja stgarpà davent il tetg d'in edifizi annex. Sin fotografias ves'ins che la bova ha cuntanschì duas chasas. Quellas na sajan betg vegnidas donnegiadas, uschia il pledader da la polizia vinavant.
La raschun da la bova anc betg clera
Daco che la spunda davos la chasa saja sa messa en moviment, na saja anc betg cler. Probablamain saja aua culada or da conducts. Dentant stoppia la lingia d'aua l'emprim vegnir controllada.
La bova haja er bloccà parts da la via d’Arosa che maina tras il vitg. En consequenza saja quella stada serrada per radund duas uras, ha communitgà la polizia.