En las vischnancas Razén, Domat, Panaduz e Favugn vegn festivà quest mais. Quai pervi ch'il anteriur Signuradi da Razén è dapi il 18 da schaner 1819 uffizialmain part dal Grischun e betg pli da l'Austria.
Fontauna a Domat fa attent sin Onna Maria Bühler
Avant ha il Signuradi bun 400 onns tutgà als baruns da Razén e suenter var 300 onns als Habsburgais. Anc oz sa zuppan blers fastizs da quel temp en la regiun. Uschia per exempel a Domat. Sin ina funtauna fa in monument attent a las acziuns curaschusas d'Onna Maria Bühler. Durant battaglias a Domat encunter ils Franzos ha ella tegnì si 2 chavals cun 1 chanun, ch'els han lura surprendì dals Franzos.
Baselgia Sogn Gieri a Razén
Surtut a Razén sa chattan blers fastizs dal Signuradi da Razén. Ils frescos en la baselgia Sogn Gieri - da gliez temp la baselgia principala dal Signuradi - han pajà ils baruns da Razén. Uschia han els organisà che lur famiglia cumpara era en differents maletgs.
Ed er en la baselgia parochiala ves'ins l'influenza dals imperaturs. Ils Habsburgais han bajegià la baselgia e plazzà lur vopna bain visibla sur il altar. In fatg spezial, cunquai che la baselgia è atgnamain in lieu separà da la politica.
Eveniment decisiv ha gì lieu en il chastè da Razén
Blers fastizs èn er visibels en il chastè da Razén, ch'è mintgamai stà il domicil dals possessurs dal Signuradi. Er il eveniment decisiv ha gì lieu en il chastè: La surdada uffiziala dal Signuradi da l'Austria al Grischun.
Ed exact 200 onns pli tard - il 18 da schaner 2019 - han là cumenzà las festivitads cun ina commemoraziun a quel di.
Telesguard 17:40