Ina perioda uschè lunga da temperaturas talmain autas n'haja anc mai dà il mais d'october. Per l'agricultura ha l'atun bel e chaud però dapli avantatgs che dischavantatgs. Ins possia anc laschar pascular ils animals e per la racolta saja l'aura chauda perfetga.
Effects nunusitads
Las periodas per la racolta vegnian per part pli stretgs. Pervia da l'aura chauda sajan per exempel pliras sorts da puma madiras en il medem mument. Quai na saja betg ideal, di Rolf Hug, il manader dal manaschi puril dal Plantahof. Era las plantas na sajan anc betg propi sa preparadas per l'enviern, quest process sa tarda in zic pervia da las temperaturas autas. Quest onn hajan ins perfin vis singulas fluras vi da plantas, quai saja extraordinari per quest temp da l'onn. Ins na stoppia dentant betg temair che las plantas cumenzian a flurir dal tuttafatg, ellas sa drizzian numnadamain a la glisch, a vegnian uss gia a sentir ch’i saja atun. Per la racolta da tartuffels, ch’è gist actuala, saja in zic memia chaud, quai possian ins dentant schliar tecnicamain.
Igl è normal ch’ins sto quintar cun ina gronda variaziun da l'aura l’atun.
Consequenzas da las temperaturas autas possia surtut dar da primavaira. I saja magari in zic ina lottaria da prender la dretga mesira. Cun quai che la perioda da vegetaziun vegnia tendenzialmain adina pli lunga stoppian ins s’adattar.
Ord vista agronomica è in bel e chaud atun il meglier che po capitar.
Pli nausch fiss in enviern chaud
Dapli quitads ch'in bel e chaud atun faschess in cumenzament imprevis da l'enviern gia il settember u in enviern miaivel perquai che las plantas flurissan gia il schaner u favrer. La primavaira possia numnadamain anc ina giada dar schelentadas e quai pudess en quest cas procurar per donns.
In bel atun è qua per giudair, fin ussa è l'enviern anc adina rivà.
