La regenza grischuna adatta las reglas davart la recrutaziun da cussegliers guvernativs per organs da direcziun. En la sessiun d'october ha il Cussegl grond tractà ina modificaziun d'ina incumbensa da la fracziun da la PPS.
Sco il chantun scriva, capita quest midament da reglas en connex cun la revisiun parziala da l'ordinaziun per la realisaziun da la «Public Corporate Governance» (PCG). L'ordinaziun duai cuntanscher in equiliber da direcziun e controlla tar las participaziuns dal chantun Grischun.
Nagina nominaziun da commembers da la regenza
La regenza grischuna ha l’incumbensa da nominar represchentants dal chantun en ils organs da direcziun da participaziuns sco la Viafier retica u uniuns e fundaziuns, sco era dad investiziuns da valurs finanzialas. Per impedir potenzials conflicts d’interess na dastga la regenza betg pli nominar u proponer per ina votaziun in da lur commembers actuals per in post da represchentaziun dal chantun suenter il temp d'uffizi.
Publitgar posiziuns vacantas
Per garantir che tut las persunas interessadas e qualifitgadas possian s’annunziar duain en avegnir vegnir publitgadas las posiziuns ch’èn d’occupar. Tar posts vacants considerabels vegn era consultà ina persuna dal fatg per segirar l’objectivitad. Las nominaziuns vegnan mintgamai publitgadas a moda adattada.
