Tut las persunas ch'han emprendì ina professiun da tgira e che na lavuran però betg pli en questa professiun duain s'annunziar tar il chantun. Il persunal spezialisà na dastgan però betg far part dad ina gruppa da risico. Quai ha la regenza grischuna decis. Sin la pagina d'internet gr.ch/coronavirus ha la regenza activà in formular.
Emprim registrar, lura engaschar
La situaziun actuala mussia ch'instituziuns da tgira vegnan ad avair stretgas tar il persunal. Sco emprim vegnian perquai registradas tut las persunas che vivan en il Grischun e ch'han ina scolaziun en il sectur da tgira, ma lavuran il mument betg. En in segund pass pudessan quellas persunas spezialisadas lura vegnir obligadas ad in engaschament.
Tenor la lescha da sanadad po il chantun obligar il persunal spezialisà da la sanadad da gidar cura ch'i va per prevegnir e cumbatter malsognas transmissiblas.