La Regenza ha approvà in project da la citad da Cuira per curreger la Plessur. Duas traversas existentas donnegiadas duain vegnir reparadas e quatter ulteriuras traversas vegnan remplazzadas tras rampas a blocs ch'èn surmuntablas per ils peschs, scriva la regenza en ina communicaziun. En cas da basegn vegnian ultra da quai reparads ils mirs da riva existents e munids cun sustegns locals.
Il project vegn a custar var 4,5 milliuns francs, quai quai ch'il chantun e la Confederaziun surpiglian maximalmain var 2,5 milliuns francs tenor la cunvegna da program da la nova gulivaziun da finanzas. Il project da correcziun dal flum protegia er la via dal Scanvetg e la via da Meiersboden. Perquai paja il chantun supplementarmain ina contribuziun per la construcziun da vias da 202'500 francs.
Questa correcziun n'è betg l'emprima sanaziun dals rempars e traversas a Cuira. Suenter che controllas regularas avevan mussà donns vi dals rempars ha la citad da Cuira lantschà differents projects dapli l'onn 2017. Tranter auter sanaziuns da rempars da la Plessur e la construcziun da rampas d'aua per ils peschs.