La davosa giada hai dà ina crudada da crappa il 2008 a Brusio. In'analisa da la vischnanca ha silsuenter mussà che cunzunt la Viafier retica è periclitada. Uss ha la regenza grischuna concedì ina contribuziun da 8,43 milliuns per segirar ils binaris.
En tut custi 10,7 milliuns francs da transferir ils binaris, segirar ils indrizs e bajegiar in rempar cunter la crappa, scriva la regenza. Las lavurs duain esser finidas il 2026.
Raits da segirezza sut Trin
Er sut Trin installescha la Viafier retica raits cunter la crudada da crappa. Il chantun Grischun sa participescha cun radund 2,75 milliuns francs vi da quai. Ils custs totals imputabels muntan a var 3,66 milliuns francs. En tut datti 10 raits che duain segirar il tschancun tranter Trin e Versomi.
Ulteriuras contribuziuns
Plinavant ha la regenza grischuna concedì radund 250'000 francs per ina cuschina da scola en il center da furmaziun Palottis a Schiers. La cuschina saja veglia e sto vegnida sanada. Ed maximalmain 100'000 francs dastga la Secziun Bernina dal CAS duvrar per sanar il «Rifugio Saoseo» en il Val da Camp.
