La regenza grischuna ha approvà ina contribuziun chantunala da tschintg milliuns francs per la nova halla da fieras ed occurrenzas «Obere Au» a Cuira. En pli vegn concedì in emprest federal da tschintg milliuns francs cumbinà cun ina contribuziun d’equivalenza chantunala da var 1,4 milliuns francs.
La nova halla da fieras a l'Obere Au è planisada sco remplazzament per la halla da la citad vertenta a la Kasernenstrasse a Cuira. La capacitad maximala en la halla principala importa 6'500 plazzas da star en pe u 3'000 plazzas da seser. L’entir project è budgetà cun custs da 43 milliuns francs.