Ils ultims onns èn vegnidas fundadas adina dapli interpresas. Tras la pandemia da corona ha quel svilup survegnì anc ina giada in stausch, di Nico Tschanz, il manader dal center dad interpresas pitschnas e mesaunas. Il 2021 èn vegnidas fundadas en il Grischun 15% dapli interpresas sco il 2018. Tge che dat dentant ferm in egl è, che l'interess da lavurar en valladas da muntogna è creschì: 64% da 1'047 fundaziuns dad interpresas en il Grischun han gì lieu en ina regiun da muntogna.
Digitalisaziun sco agid per far il pass en las muntognas
Tras la pandemia da corona hajan badà blers chi'ns na stoppia betg pli esser uschè lià al lieu da lavur, e chi dettia bleras variantas flexiblas per lavurar. Damai cha bleras interpresas han ina gronda part da la lavur digitala saja quai pussibel da lavurar era or d'ina regiun da muntogna ed esser tuttina actual.
Blers prefereschan da viver en las muntognas e dad ir alura forsa 2 dis l'emna giu la Bassa per la lavur – ma lavurar uschiglio en las muntognas enstagl dal cuntrari.
Grond potenzial
Nico Tschanz vesa en questas novas interpresas ina gronda schanza per il Grischun e las regiuns da muntogna. Quai mainia novas plazzas da lavur en las vals, ed uschia vegnian pliras persunas puspè a star en las muntognas. Tut en tut saja quai in bun svilup per l'ecosistem grischun, di Tschanz.