Intransparenta e malgista saja la repartiziun da las dosas da vaccin tras la Confederaziun. Uschia la critica che Marina Jamnicki, la media chantunala dal Grischun, ha fatg la sonda en in’intervista cun la gasetta Südostschweiz. Perquai ch'il Grischun haja sminà ch'i vegnia a dar problems tar la furniziun dals vaccins – hajan els gia mess en salv la segunda dosa ch'i dovria per cuntanscher ina buna protecziun. L’Uffizi federal da sanadad manegia dentant ch'il chantun vaccineschia memia pauc, ed ha stritgà ina part da las dosas empermessas. Jamnicki pretenda dal BAG da curreger quai – e che lez instradeschia puspè ina clav da repartiziun transparenta.
La clav da repartiziun na mida betg
En la conferenza da medias dal mardi a Berna ha Nora Kronig dal BAG ussa reagì sin las rinfatschas. Tenor la responsabla dal BAG per ils vaccins, n’hajan els betg midà la clav da repartiziun. Quella saja clera e sa basia vinavant sin il dumber da la populaziun e da las gruppas vulnerablas.
