Forza electrica daventa pli chara en il Grischun. En mintga cas per ils clients e las clientas da l'interpresa Repower. Sco ella scriva en ina communicaziun s'augmentan las tariffas per stgars 7%. Ina chasada media cun in consum annual da 4'500 uras kilowatt paja var 98 francs ad onn dapli – ils custs effectivs dependan dal consum individual.
Prognostitgar il consum daventa pli difficil
La damaun, cura che las persunas dal Grischun envidan la glisch, sto la rait d'electricitad immediat furnir dapli energia. La saira, cura che tuttas e tuts stizzan puspè la glisch, va main forza en quella rait. L'interpresa da forza electrica sto uschia producir exact uschè bler sco quai che la glieud consumescha. E gist quai daventia adina pli difficil, di Michael Roth envers il Schurnal regiunal da SRF. El lavura tar la firma Repower ed è responsabel per la rait d'electricitad e la producziun.
I vegn adina pli difficil da far prognosas cunquai ch'i dat adina dapli implants fotovoltaics.
Sche l'aura è per exempel pli nauscha che prognostitgà da la Repower, lura vegn tramess memia pauca forza electrica en la rait. En quel cas sto la Repower cumprar dapli forza electrica. E quella è pli chara che en il cas normal. A la fin ston lura las consumentas ed ils consuments pajar quels custs.
Perquai che la strategia d'energia da la Confederaziun vul in schlargiament massiv d'implants fotovoltaics, daventa questa problematica adina pli gronda. Cunquai che la fotovoltaica è fitg dependenta da l'aura, è l'influenza da las prognosas e l'aura effectiva anc pli gronda. Ed entras quai s'augmentan ils custs da la forza electrica per las chasadas grischunas.
Accumular energia sco pussaivla soluziun
Ina soluziun per minimar la problematica, saja d'accumular l'energia ch'è surpli. Entras novas tecnologias vegnia pli simpel da rimnar las datas en temp real. Uschia pudessan ils producents da la forza electrica reagir meglier sin las variaziuns, di Michael Roth. I duvrass lura damain energia per l'egualisaziun.
Cunquai ch'i dat adina dapli implants solars sin ils tetgs dals clients da la Repower, stoppia l'interpresa schlargiar las raits d'electricitad.
Fin uss è la rait stada adattada tenor basegn da las clientas e clients. Da nov ston ins uss dentant adattar la rait pli fitg tenor ils implants fotovoltaics.
Entaifer paucas uras spisgentan ils implants fotovoltaics numnadamain fitg blera energia enavos en la rait. La Repower investescha per quest motiv mintg'onn 30 milliuns francs per schlargiar la rait d'electricitad. Quai per avair avunda capacitads da reagir sin la producziun differenta dals implants fotovoltaics ed ils basegns da la clientella. Tge vul quai ussa dir per las chasadas grischunas? La forza electrica resta bain regenerabla e segira, ma ella daventa probablamain er anc pli chara en il futur.
Tut auter era quai la fin dal 2024 – però era cun autras raschuns.
Era tar l'EWZ e l'Energia Engiadina vegni pli char
La nova lescha d'electricitad che entra en vigur davent da l'emprim da schaner 2026 ha in effect sin ils pretschs per ils consuments e las consumentas, declera Thöme Jeiziner, il pledader da medias da l'EWZ. L'interpresa na furnescha betg mo electricitad en il chantun da Turitg, nua che la sedia è, mabain er en parts dal Grischun.
Pervia da la nova lescha stuain nus introducir ina nov tariffa da mesirar che munta tar l'EWZ a 6,90 francs per mais (82 fracs per onn). Pli baud èn quels custs stads dependents dal diever ed oz è quai ina summa fixa.
L'argumentaziun sa basa era qua sin la medema logica. Tenor il sistem vegl sa drizzava la producziun tenor il diever da consumentas e consuments. Ussa sa drizza ella er tenor las capacitads che la rait dovra per cuvrir las variaziuns ch'i dat entras ils sistems fotovoltaics.
Era l'interpresa Energia Engiadina che furnescha electricitad en l'Engiadina Bassa ha ina situaziun sumeglianta. Ils clients e las clientas ston pajar tut en tut circa 3% dapli per l'electricitad, conferma il directur Claudio à Porta.