La glieud vul emplenir las reservas en vista a l'enviern. Fatschentas che vendan laina dad arder, per exempel Parpan Forst- und Energieholz u era la Landi a Glion, han bleras empustaziuns. Enstagl dad in ster (1 m³) empostian blers gist dus u trais, di Marco Parpan. Plinavant guardavian las clientas ed ils clients normalmain pir il settember u october ch'els hajan avunda laina. Quest onn è quai il cas gia l'avust.
I vegn cumprà dapli e pli baud
Dentant betg mo tar fatschentas pon ins cumprar lain dad arder, mabain era tar vischnancas. Tranter auter era tar las vischnanca da Scuol, da Surses e da Tujetsch. Era là han ils selviculturs bler da far:
Nus vendevan enturn 100 sters. Ed ussa, l'onn 2021 e 2022, essan nus da manaivel da 200. Pia il dubel.
Stgaudar pon ins dentant betg mo cun stganatscha, mabain era cun pellets. Era quels bastunets da lain manizzà èn tschertgads en las chasadas grischunas. La fatschenta «Pellets Lager Graubünden» da Cazas è ina da quellas che venda quest material dad arder il mument tut a dubel:
Per noss clients datti anc avunda. Ma sch'insatgi ha atgnamain in auter furnitur, lura ditg jau da restar tar lez, perquai che mintgin cumpra la quantitad per ils agens clients.
Il pretsch pli aut na para betg da franar
Ch'ils pellets èn tschertgads di era Peter Lehmann ch'è president da l'uniun «Pro Pellets». Quai malgrà ch'il pretsch è creschì dapi l'onn passà per passa la mesadad. Quai tranter auter era pervi da la gronda dumonda e pervia da la guerra en l'Ucraina.
Saja quai tar stganatscha u tar pellets: Daco che la dumonda è la finala uschè gronda, ha plirs motivs. La malsegirtad ch'ins na pudess l'enviern betg avair avunda electricitad e gas, ed uschia betg avunda chaud – è probabel in da quels.