Perina è la cumissiun cun la proposta da la regenza che famiglias dastgan trair giu dapli da la taglia per la tgira d'uffants tras terzas persunas. Er che pèrs cun duas pajas dastgan trair giu dapli da la taglia sustegna la cumissiun unanimamain.
Discussiuns davart deducziuns per uffants ed import liber
Betg perina è la cumissiun dal Cussegl grond cun la proposta che famiglias dastgan trair giu dapli per ils singuls uffants. Questa mesira na distgargia betg tuttina tut las famiglias. Tuttina ha sustegn la maioritad da la cumissiun er quest punct.
Betg d'accord è la maioritad da la cumissiun dentant cun la proposta d'augmentar l'import liber tar la taglia chantunala. Quai na saja betg ina mesira cun ina clera finamira e chaschunia grondas perditas per las vischnancas. Ina minoritad da la cumissiun è però per auzar anc pli fitg che proponì da la regenza l'import liber.
Tema en la sessiun d'avust e forsa er anc il december
A la fin ha la cumissiun però predeliberà la missiva per mauns dal Cussegl grond. Quel vegn pia a sa fatschentar cun revisiun parziala da la lescha da taglia en la sessiun d'avust. Discutà a moda cuntraversa ha la cumissiun er, schebain la taglia stoppia supplementarmain tar la revisiun da la lescha da taglia er anc vegnir sbassada per ademplir l'incumbensa dal deputà Oliver Hohl. Questa dumonda vegn però pir a fatschentar il parlament en la sessiun da december en il rom da la discussiun da budget, nua ch'i va er per fixar il pè da taglia.