Tgi ch’entra curt avant l’entschatta da scola en ina papetaria po spert esser surdumandà. Dapertut vegn fatg reclama per in product e la schelta dad tutta rauba da scola sco per exempel da risplis e turnisters è immensa. Marc Pfister è scolast primar a Glion e da l’opiniun ch’ins duaja plitost cumprar en a moda «defensiva». Vul dir: I na dovra betg in turnister da luxus cun numerusas tastgas. Gist èn l’emprima classa na dovria betg in turnister spezial, damai ch’il gust da l’uffant vegn a sa midar uschia ch’i saja il pli tard en la 3. classa da cumprar in nov cun auters musters. Ma i saja impurtant ch’el saja confortabels.
Tenor mes manegiar vegn era fatg blers daners cun l'entira tematica da turnisters.
Vinavant duajan ils geniturs betg cumprar immediat tut. Il scolast da Glion manegia ch’ins duai guardar pass per pass tge che l'uffant dovra. L'emprim di saja segir bun d’avair in etui cun enqual colurs da lain, in satg da gimnastica ed in pèr pantoflas. Tar ils utensils da scriver e malegiar possian ils geniturs cumparar insatge da buna qualitad. Quai sajan chaussas ch'ins vegnia a duvrar durant l'entira carriera da scola.
Rauba da marca chaschuna conflicts
Cumprar rauba da marca u cun motivs da figuras ch’ins enconuscha entras la televisiuns saja era heicli. In uffant cun 3 etuis traglischants e fieuters tut a dubel po chaschunar gronda scuidanza ed uschia potenzial da conflict.