Rolf Giger - Raquintar istorgias cun il rispli

Mintga mastergnant, mintga professiun, ha in utensil tipic: Il cuschinunz la palutta, la magistra la tabla, l’electricist il tirastruvas, la hoteliera las clavs, il lainari ina trav. L’utensil tipic dal caricaturist è il rispli. «Latiers anc la gumma ed in fieuter nair», agiunta Rolf Giger.

Dacurt ha l’um da 58 onns cun fermas ragischs a Cuira avert en la Obere Gasse 12 sia emprima exposiziun – malgrà ch’el dissegna dapi sia uffanza. Oz sa vesa el en emprima lingia sco cartoonist e betg sco caricaturist. Rolf Giger è naschì cun quest dun e maun expressiv da dissegnar. Rispli e fieuter èn ses utensils da s’exprimer, commentar e render attent.

Cun 13 onns emprima publicaziun

Sia emprima caricatura haja el pudì far en la vegliadetgna da 13 onns, tradescha Rolf Giger. A chaschun d’ina visita en il nov lieu «Haus der Illustration» a Cuira mussa el era quella. Mintga original dals dissegns ch’el ha fatg ha el conservà en mappas, tut è classà tenor sistem. In archiv nunditg da situaziuns ed istorgias.

Uschia po el mussar la creaziun ch’el aveva fatg l’onn 1981 uffizialmain per la Polizia chantunala grischuna. La centrala a Cuira aveva vulì visualisar ina part da ses servetschs, ed il giuven talent aveva persvadì in dals funcziunaris responsabels. Uschia ha il mat pudì far diversas caricaturas che mussan ils policists en acziun – dissegnà cun in’egliada umoristica.

Rolf Giger ha la premissa principala ch’i dovra per far caricaturas e cartoons: Sia funtauna d’ideas è inexauribla e ses dun d’observar marcant. Uschiglio na pudess el betg producir cuntinuadamain in dissegn suenter l’auter per las pli diversas medias. Rolf Giger n’è betg quel dals texts lungs. Ses talent particular è quel da laschar discurrer las illustraziuns.

«La vaira istorgia»

Cun ina exactadad acribica «commentescha» el situaziuns e fatgs dal mintgadi. Lecturas e lecturs dal «Bündner Tagblatt» conuschan sia caricatura che cumpara regularmain sin il frontispizi. Mintga venderdi prenda el posiziun ad in’actualitad, cun ina suletta illustraziun tutga el la noda.

Per exempel gievgia passada. Curt avant Pasca ha Rolf Giger illustrà il frontispizi da la gasetta cun il dissegn d’ina tauna. Mintgin è s’accurschì ch’igl è la fossa da Cristus, il crucifitgà. L’illustraziun mussa gist il mument ch’il bloc da l’entrada croda, a moda explosiva, enavant. Tuppamain era la lieur da Pasca, occupada cun zuppar ils ovs, gist quest mument davant l’entrada. Platta e smatgada è ella sut il bloc ed ins vesa sulettamain anc in dals ovs colurads. Il cartoonist scriva suravi: «Die wahre Geschichte des Osterhasen!»

Avant onns il «Cartoonet» per La Quotidiana

Tgi che guarda quella caricatura sto surrir. Ina giada dapli ha Rolf Giger tutgà la noda. Igl è ina da nundumbraivlas istorgias ch’il cartoonist «raquinta» dapi decennis. Dacurt è cumparida ina en il renumà «Nebelspalter», la revista satirica svizra.

Regularmain dissegna el per las gasettas emnilas da Somedia, era per publicaziuns da la citad da Cuira ed organs da vischnancas. Lecturas e lecturs fidaivels da La Quotidiana conuschan era sias caricaturas. Ils onns 2015 e 2016 cumpareva sin la davosa pagina in «cartoonet» cun mintgamai in dissegn da Rolf Giger.

Rolf Giger dissegna ina lieur

Ensemen cun sia dunna Elena Giger porscha l’um creativ curs che introduceschan en in hobi creativ. «Nus essan in bun team ed jau hai grond gust da mussar e dar vinavant co ch’ins po caracterisar l’expressiun da la fatscha ed il linguatg dal corp.»

Rolf Giger ha dal rest fatg lavurs era per la «Sibla», la gasetta da tschaiver da Mustér. El collavura anc adina cun la Lia Rumantscha, la figura «Nin Palantin» per exempel è ina da sias creaziuns. Era per revistas spezialas, gasettas da tut gener e per projects da cudesch illustrescha Rolf Giger cuntinuadamain.