La plazza d'armas al Rossboden a Cuira pertutga era las abitantas ed ils abitants da la citad da Cuira e da la vischnanca da Favugn. Il president da la citad da Cuira Hans Martin Meuli ha declerà, ch'ils resultats da las mesiraziuns na surpassian betg la limita da las emissiuns da canera. Tar quatter chasas a Favugn è la canera da la plazza d'armas dentant memia auta. Pervia da quai sto il Rossboden vegnir sanà. La canera vegn mesirada en medias. Sch'igl è intgins dis dad aut da la canera da tir e lura intgins dis puspè calm, alura na surpassa la media betg la valur.
Al Rossboden han ins enfin uss adattà ils temps da tir, ed i vegn tratg cun surdinas. Tar la sanaziun planisada vegn lura serrà in stan da granata a maun, ed in auter vegn spustà. Tras quai duai lura era la canera tar las quatter chasas a Favugn esser sut la valur. Hans Martin Meuli parta dal fatg che a Cuira n'è betg da sentir bler da la sanaziun. Ils custs surpiglia il departament da defensiun VBS. Ils plans da l’armada èn pia sin maisa.
La sanaziun vegn dentant ad avair lieu cun retard. Il motiv è tenor il VBS ina spezia stgarsa da salips ch'è numnada sin la charta cotschna d'animals periclitads. Sin basa da quai han ins involvì il post spezialisà dal chantun – e questas retschertgas han duvrà dapli temp che pensà. Quest motiv ha Hans Martin Meuli prendì encunter cun ina tscherta irritaziun.
Cura ch'jau hai udì che tut vegn retardà pervia da salips vai jau gì da surrir. Igl è dentant uschia ch'i ha dà recurs. Jau mez vai fatg la scola da recruts al Rossboden e sun stà en la buglia. E là hai era gì blers insects.
L’armada è vegnida tar la conclusiun che la canera na disturba betg propi quests salips, uschiglio na fissan quels betg pli là. Uss poi ir vinavant cun la permissiun da construcziun e cun la conferma da finanziaziun. Cura che la sanaziun da canera al Rossboden è a fin saja grev da dir.
