Siglir tar il cuntegn

Grischun RTR e sia rolla per ina gasetta rumantscha

La gruppa da lavur medias rumantscha elavura il mument plirs models per in product rumantsch stampà. Optimar la collavuraziun e las sinergias vertentas è la finamira. Da la Quotidiana en sia furma actuala èsi en il decurs da l'auter onn da prender cumià.

La quotidiana ed RTR.
Legenda: La Quotidiana ed RTR. Screenshot.

Tut ils meds da massa rumantsch sut in tetg. Ed il pli gugent sut quel dad RTR. Quai han ins tranter auter udì a la Radunanza da la Surselva Romontscha. «RTR vegn mai a stampar ed a distribuir ina gasetta rumantscha», di la directura da RTR, Ladina Heimgartner. L'Agentura da Novitads Rumantscha che furnescha oz ils cuntegns da la Quotidiana stoppia restar suttamessa ad in'organisaziun purtadra independenta. Radiotelevisiun Svizra Rumantscha pudess il pli da tut surpigliar l'entira coordinaziun da resursas e cuntegns. Quai cun la finamira d'optimar ed unir las forzas a favur d'ina vasta purschida or da las regiuns rumantschas.

Il proxim pass en chaussa model futur pussaivel per in product rumantsch squitschà è in'audienza tar l'Uffizi federal da communicaziun per mirar e tadlar, tge ch'è insumma realistic e tge cumpromiss ch'i dovra.

RR actualitad 12:00