Siglir tar il cuntegn

Header

Navigaziun

Legenda: Tadlar il audio Mezdi: Turitg avess pli gugent in agen uvestgieu. Durada 03:13 minutas.
03:13 min, Actualitad dals 23.04.2019.
cuntegn

Grischun Sa in nov uvestg schliar la dispitta tranter Cuira e Turitg?

En l'uvestgieu da Cuira aud'ins adina puspè da dispitas tranter Turitg e Cuira – ina dispita, ch'è 200 onns veglia.

Cur che l'uvestgieu da Constanza è vegnì schlià avant 200 onns èn ils chantuns Turitg, Uri, Glaruna, Sursilvania e Sutsilvania vegnids associads a l'uvestgieu da Cuira. Atgnamain be provisoricamain per l'administraziun - dentant in provisori che dura enfin oz.

Avant 200 onns era quai tuttina als Turitgais

Da lezzas uras na saja quai anc betg stà in problem, di Simon Spengler da la baselgia catolica chantunala da Turitg. Lura na deva quai strusch catolics en il chantun refurmà.

Oz vivia dentant passa la mesadad dals catolics da l'uvestgieu da Cuira a Turitg. Ed els hajan tut in'autra realitad che en ils chantuns champesters – per exempel a reguard migrants u maridaglias tranter differentas religiuns.

L'uvestgieu da Cuira cumpeglia betg be la curt episcopala da Cuira, mabain tar el tutga er Turitg.
Legenda: L'uvestgieu da Cuira – dapli che be la curt episcopala da Cuira, tar el tutga er Turitg. Keystone

Senza Turitg mancan daners

Perquai saja quai magari grev per il chantun Turitg da vegnir manà davent da Cuira. Far da Turitg in agen uvestgieu pudess be la conferenza dals uvestgs – e natiralmain ha er l'uvestg da Cuira in pled en capitel.

Tant l'uvestgieu sco er ses auters chantuns na desistan betg gugent da Turitg: Senza Turitg mancan ils daners.

Forsa maina in nov uvestg novas soluziuns

Betg be l'uvestgieu da Cuira ha in territori sparpaglià – ils chantuns Turgovia e Schaffusa tutgan per exempel tar l'uvestgieu da Basilea. Ina nova repartiziun faschess tenor Simon Spengler da la baselgia catolica chantunala da Turitg bain senn, dentant vali er qua: Be ils sis uvestgs da la conferenza d'uvestgs pudessan communablamain reparter da nov ils chantuns.

Forsa riva dentant cun il nov uvestg da Cuira er nov schlantsch en la discussiun per schliar la dispita u er rinforzar models che dattan a Turitg dapli pussanza. Quai pudess vegnir fatg per exempel cun etablir in uvestgieu dubel Cuira/Turitg.

RR actualitad 11:40