Sa profilar en il Cussegl grond?

En sis mais elegia il Grischun ina nova regenza ed in nov parlament. Chaschun per politicras e politichers per sa metter en posiziun durant la sessiun da december.

Il maletg mussa la sala vita dal Cussgl grond. Bild in Lightbox öffnen.

Legenda da maletgs: Tgi sesa a partir dal 2019 sin quels plazs en il Cussegl grond? RTR

Budget, program da spargn, cultura, chatscha speziala - tut quai è vegnì discutà durant ils trais dis da la sessiun da december dal Cussegl grond. Ed adina puspè èn las elecziuns stadas in tema.

Cumbat è part dal gieu

La dumonda quant che saja propi stà cumbat electoral durant la sessiun ha fatg rir ils represchentants da las fracziuns. E natiralmain han els respundì che be ils auters fetschian propaganda ed els sez betg.

Jan Koch (PPS) e Conradin Caviezel (PS) èn da l'avis ch'ins haja sentì plitost pauc cumbat electoral. Il medem mument renfatschan els dentant in a l'auter da nizzegiar las debattas per plazzar temas e sa profilar.

Per Vera Stiffler (PLD), Gian Michael (PBD) e Hans Geisseler (PCD) èsi cler: Las debattas èn stadas influenzadas da las elecziuns che spetgan ils 10 da zercladur 2018. Quai hajan ins surtut sentì tar las dumondas ed incumbensas.

Bleras dumondas ed incumbensas

En la sessiun da december han deputadas e deputads inoltrà total 15 incumbensas, dumondas ed iniziativas parlamentaras. Plinavant è vegnì fatg total 14 dumondas a la regenza durant l'ura da dumondas.

Liquidà ha il parlament durant la sessiun total 13 intervenziuns parlamentaras. Per il rest n'ha il temp betg bastà, uschia che quellas vegnan spustadas sin la sessiun da favrer. E l'avrigl 2018 tegn il Cussegl grond ina sessiun a posta per liquidar las bleras pendenzas.

RR actualitad 12.00