Dapi il prim da december 2023 han ils chantuns la pussaivladad da regular ils trieps da lufs betg mo a moda reactiva, quai vul dir suenter ch'ils donns èn capitads e verifitgads, - mabain era proactiv e preventiv. Durant l'enviern 2023/24 e 2024/25 è vegnida realisada questa chatscha da regulaziun cun ils suandants resultats.
Sco quai ch'il BAFU scriva, ha la creschientscha rasanta da la populaziun dals lufs en Svizra pudì vegnir franada tranter auter er grazia a la regulaziun dals lufs. La «Gruppa Luf Svizra» vesa quai auter: Ils lufs reguleschian sezs e tranter els, uschia che la populaziun na creschia betg uschè ferm. L'effect da la chatscha da regulaziun na saja betg uschè grond sco supponì dals uffizis.
Ils lufs èn animals territorials. Quai vul dir: Sch'in triep ha in agen lieu, na sa domicilieschan nagin auter là.
Plinavant scriva il BAFU en ses rapport che la chatscha da regulaziun saja - sper la protecziun da muntaneras - ina raschun impurtanta, pertge ch'ils stgarps da lufs èn sa reducids. La Gruppa Luf Svizra è dentant era qua da l'avis che l'influenza da la chatscha da regulaziun saja betg uschè gronda sco pretendì. Ils stgarps sajan sa reducids gia avant l'emprima fasa da regulaziun. La raschun principala saja la protecziun da las muntaneras che saja vegnida sviluppada meglier e pli ferm.
Critica per la regulaziun preventiva
La «Gruppa Luf Svizra» deplorescha ch'ins vesia mo ina pluna lufs morts, dentant nagin resultat concret. Cler ch'ins stoppia pudair sajettar lufs che chaschunian problems. Ma tala chatscha preventiva sin lufs chaschunia mo a curta vista ina meglra situaziun, di l'organisaziun per la protecziun dals lufs. Ils lufs sa multiplitgeschian puspè fitg svelt ed ins stettia puspè davant il medem problem. Er il BAFU è conscient che la finamira saja la convivenza tranter l'uman ed il luf. Cun agid da dapli datas rimnadas ils proxims onns vegnian ins a pudair giuditgar meglier la situaziun e las consequenzas da la chatscha preventiva.