Per l'ultima giada ha Julius Maissen tratg en il mantè en las colurs da la vopna grischuna e la chapella dal salter chantunal. Quai suenter ch'el ha fatg servetschs da salter durant 28 onns, 14 da quels sco um pensiunà.
In salter serva a la regenza ed accumpogna lezza ad acts uffizials. El haja adina fatg gugent questa lavur, di il Sursilvan ch'ha vivì ditg a Cuira ed uss puspè a Mustér, nua ch'el è creschì si.
Quai è in'onur, la finala sun jau il sulet salter en il chantun Grischun. Sch'i era pia occasiuns spezialas era cler che jau dastgel far quai.
Durant ses temp haja el udì e vesì bler en la politica. Scurlà mauns ed emprendì d'enconuscher politicras e politichers ed accumpagnà quels a viadis enturn Cuira ni er Berna. In punct culminant per Julius Maissen è la festa per il pli aut Svizzer Martin Candinas stada l'onn passà. I saja stà bellezza ma er stregn. Perquai ch'ils viadis fan adina pli gronds fastidis al Sursilvan dat el uss giu ses pensum. Quai cun in egl cridant ed in che rient.
Successura da Julius Maissen sco salter daventa Heidi Nold che lavura tar la Chanzlia chantunala. Quai è l'emprima giada ch'ina dunna fa quest uffizi.
