Cun Christian Rathgeb e Martin Vincenz èn duas fatschas enconuschentas da nov part dal cussegl d'administraziun da la San Bernardino Swiss Alps. L'anteriur cusseglier guvernativ Christian Rathgeb ed il directur da Grischun Vacanzas Martin Vincenz, possian gidar a sviluppar il project da revitalisar la destinaziun turistica, hai num en la communicaziun da l'interpresa San Bernardino Swiss Alps. Sco terz cumplettescha l'expert d'immobiglias Flavio Petraglio il cussegl d'administraziun.
Sut il timun dal milliunari tessinais Stefano Artioli vul l'interpresa investir var 300 milliuns francs per construir e sanar bajetgs en il vitg sco e per reactivar il territori da skis da San Bernardino ch'è serrà dapi bun 10 onns. Ils 18 da zercladur han ils da San Bernardino dà lur consentiment per l'entir project cun in cler Gea a l'urna per la vendita da terren e dretgs da construcziun a l'interpresa.
