Siglir tar il cuntegn

Header

audio
San Vittore tschertga per la 10avla giada en 6 onns suprastantA
Or da Actualitad dals 22.08.2022.
laschar ir. Durada: 2 minutas 32 Secundas.
cuntegn

San Vittore Ulteriuras midadas en la suprastanza

San Vittore tschertga schon puspè ina persuna per la suprastanza. En ils davos sis onns è quai la dieschavla giada che la suprastanza sto vegnir cumplettada. Ils motivs per las demissiuns èn divers – quels cumpiglian er resignaziuns.

La vischnanca da San Vittore en Mesolcina tschertga schon puspè ina persuna per la suprastanza communala. Tenor la presidenta communala Nicoletta Noi-Togni, ch'è dapi il 2016 a la testa da la vischnanca, sajan ils motivs divers. Quels cumpiglian midadas da domicil, lavur che na lubescha betg in pli grond engaschament da temp u simplamain naginas recandidaturas.

La prontadad da s'engaschar politicamain tschessa

La dunna dad 81 onns observescha dentant er ch'il temp e la societad, ed uschia la prontadad da s'engaschar sin stgalim politic tschessa. In fatg che saja deplorablamain er d'observar, sajan attatgas per part persunalas sin persunas en uffizi. Vers radio RSI ha Nicoletta Noi-Togni er ditg:

La glieud, per esser sincer, ha fadia da sa metter a disposiziun. En pli datti critica d'ordaifer ed i vegn bittà cun merda sin ins en mintga radunanza. Insacura dis ti: «Ma tge fatsch jau qua?»
Autur: Nicoletta Noi-Togni Presidenta communala da San Vittore
Nicoletta Noi-Togni
Legenda: Nicoletta Noi-Togni RTR, Michel Decurtin

Nicoletta Noi-Togni è er da l'opiniun ch'ella n'haja nagina obligaziun da dumandar las qualificaziuns d'ina persuna che vul entrar en suprastanza.

Enfin glindesdi ils 22 d'avust pon vegnir inoltradas a scrit las candidaturas per il post da suprastanza vacant.

RTR actualitad 08:00

Artitgels legids il pli savens