Pazientas e pazients en la regiun Plessur enturn l'Ospital chantunal a Cuira pon tut tenor vegnir tgirads a chasa. Sco quai che l'Ospital chantunal e l'assicuranza da malsauns ÖKK communitgeschan, marscha ils proxims dus onns in project da pilot per evaluar l'effizienza e l'efficacitad dal sistem «hospital@home».
En il center da quest model da provediment stat ch'il persunal da l'ospital tgira pazientas e pazients a chasa. Per il project da pilot vala:
- pazientas e pazients ston esser clientas u clients tar la Ökk e ston abitar en in radius ch'i èn cuntanschibels aifer 30 minutas cun l'auto
- la diagnosa, terapia e tractament ston esser taluisa ch'ella pon vegnir fatgas a chasa sco en l'ospital
Tenor il manader dal project Gregory Fretz da la policlinica da l'ospital chantunal èsi impurtant ch'il tractament che vegn fin ussa fatg staziunar en l'ospital po vegnir fatg da moda segira a chasa. Ina app duai gidar e procurar per ina buna ed effizienta communicaziun tranter il persunal medizinal ed ils pazients.
Ina da las grondas finamiras dal project saja da sminuir ils custs dal provediment da sanadad. Quant che quai vegn ad esser, saja ussa anc grev da dir. Per il mument saja impurtant da rimnar experientschas praticas, rimnar datas validas e tras quai crear ina basa fundada per valitar ils custs. Sche la fasa da test saja in success, lura dessi la pussaivladad da schlargiar la purschida per tuttas e tuts en il chantun grischun.
L'assicuranza da malsauns ÖKK sustegna il project finanzialmain.