Mintga segunda persuna patescha ina giada en sia vita d'ina malsogna psichica, scriva l'Uffizi chantunal da sanadad. Per promover la sanadad da la populaziun organisescha l'uffizi ensemen cun 37 organisaziuns ina retscha d'occurrenzas sut il titel «Concepir ils pass en ina nova fasa da la vita». Il tema general da questa retscha d'occurrenzas èn las difficultads che vegnan cun novas fasas da la vita. La sfida saja d'acceptar e da crescher cun la nova fasa da la vita sco er da colliar sentiments positivs cun tala.
Da tgirar la sanadad psichica na sa chapescha betg adina da sasez. Tar difficultads èsi impurtant da savair ch'i dat agid professiunal.
Giuvenils, geniturs e persunas attempadas
Giuvenils fan tras la pubertad e ston sa decider tge far suenter la scola obligatorica. Pli tard sa mida la vita d'in pèrin cumplainamain cura ch'in uffant è sin via. Ed era persunas attempadas han da sbatter cun sfidas per exempel en connex cun la pensiun. Las occurrenzas da l'acziun per promover la sanadad psichica sa drizza quest onn a questas trais gruppas da persunas: giuvenils, geniturs e persunas attempadas.
Gia la tschintgavla seria d'occurrenzas
Il chantun Grischun organisescha per la tschintgavla giada ina seria d'occurrenzas tar il tema sanadad psichica. Las 26 occurrenzas han lieu dal 1. fin ils 19 da settember 2022 en l'entir Grischun e per part er online. Il program cumpiglia projecziuns da films, tocs da teater, lavuratoris e discussiuns al podium cun temas sco avair uffants, la vita suenter la scola, la pensiun u viver cun demenza. Sper persunas spezialisadas sajan er persunas pertutgadas preschentas, scriva il chantun.