Tras la midada da l'urari 2026 mez december 2025 duai la purschida dal traffic public en il Grischun vegnir meglierada. Il nov sboz da l'urari per l'onn proxim va en consultaziun a partir da venderdi, sco quai ch'il chantun communitgescha. Finamira clera è d'ina vart da meglierar las colliaziuns aifer il Grischun, e da l'autra vart da colliar meglier il Grischun cun il rest da la Svizra e la Germania. Il sboz è vegnì creà en collavuraziun cun las interpresas da transport e las regiuns.
Aifer il Grischun
- Tranter Cuira e Glion duai il tact da mes'ura vegnir instradà tranter las 07:00 e las 20:00.
- Da Glion a Mustér duai dar in tact da mes'ura dal tren en cumbinaziun cun la posta. Sper il tren regular duai l'auto da posta porscher in bus a Mustér mintg'ura.
- Dapli colliaziuns datti era tar il bus express da Poschiavo a Samedan.
- Dasperas vul il chantun augmentar las colliaziuns durant la stagiun auta en las regiuns turisticas Engiadina Bassa e Lai.
Cun il Grischun
- Il tren spert tranter Turitg e Cuira duai circular gia a partir da las 06:00 e las 19:00 en tact da mes'ura.
- Las colliaziuns dal bus express da Cuira a Bellinzona vegnan augmentadas.
- Era planisadas èn trais novas colliaziuns da Cuira en la Germania – concret a Hamburg, a Cologna ed a Francfurt.
Ordaifer il Grischun
Cun la midada da l'urari èn era prevesidas midadas pli grondas en l'ulteriura Svizra. Las Viafiers federalas SBB augmentan surtut en la Svizra dal nordvest, però era colliaziuns dal traffic dal temp liber. Per exempel introducescha la SBB il tact da quart d'ura tranter Basilea e Liestal (Basilea-Champagna), tranter Basilea e Bienna è previs il tact da mes'ura. E sin plaun internaziunal datti duas ulteriuras colliaziuns da Turitg a Milano Centrale.
La consultaziun per quest sboz per l'urari dal traffic public dura dals 23 da matg enfin ils 9 da zercladur.
