Siglir tar il cuntegn

Grischun Sch'il fondue chinoise sto restar en mazlaria

Betg mintgin dastga avrir ses affar ils 24 da december: Nadalnotg è quest onn ina dumengia e cun quai valan reglas per la vendita da dumengia. En tschertas vischnancas èsi schizunt scumandà da vender quel di.

Ina mazlaria.
Legenda: Betg mintga butia dastga avrir ils 24 da december. Keystone

Tenor l'uffizi per industria, mastergn e lavur vala: Mintga vischnanca po avrir sias butias durant quatter dumengias l'onn. Tgeninas dumengias decida la vischnanca ensemen cun ils affars. Plinavant dastgan be duas dumengias esser en il temp d'advent. Las datas tschernidas han silsuenter da vegnir inoltradas a l'uffizi.

Excepziuns valan per regiuns turisticas

Durant la stagiun pon las butias avrir cura ch'ellas vulan – uschè ditg ch'ellas resguardan las leschas da lavur. Tge temp ch'è il temp da stagiun decida l'uffizi da lavur.

Regiuns turisticas èn lieus ch'èn enconuschents per lur turissem. Ma era quels lieus che han durant la stagiun bler dapli gudogn che uschiglio. Ina glista exacta da lieus turistics n'ha l'uffizi da lavur dentant betg. Els vegnan a decider en mintga cas singul.

RR actualitad 08:10

Lieus da turists en Grischun

Ils vitgs da l'Engiadina, Muster-Sedrun, Flem-Laax-Falera, Arosa, Clostra-Tavau, il Poschiavo e parts dal Surses valan sco lieus da turists.